Pipica Novi foji, broj 51 2.7.2007 9:28

Pifar od "Borova" šo va penzijon pokle kvarnor i dve leta bez dona bolovanja

Da bin vas malo zaintrigo, ono ca son piso finjetke ću napisat na pocetke moje pađini. Puno tega son dobi preko interneta pa bin ote malo više tega napisat. Drogo mi je da se toliko ljudi jovlja, a to je sinjol da šteju "Novi foji" i se to mi do materji da laglje napišen svoju pađino.

Vidin da se još prehtate oko tega ca je Aldo Krajcar napiso preko interneta. Ja bin radi da se Aldo, Stanić i ja nojdemo kad Aldo pride od Kanadi. Neson kapoca joko teć, ali do prve oštariji ću hi sigurno preteć. Pišete mi da su talijonski penzjuni, kampanji i store kući posvadile cele fameji. To je prova istina. Tuka je bilo i će bit sacega. Više ne paso ona kancona da ni se va šoldami. Kad se treba delit pridu doma oni keh ni bilo lit i lit, kad so ocu i matere najviše trebali...

Pero nas je sakakoveh, doma i po svite, zato nemojmo pustit da nas šoldi zaštupidojo. Oni ki su šli po svite, i još vajka hode, ne reju ca hi to pježo, već hi sila natira. Dok ne pridu na svoje, vervajte vi meine, da na retko sero. Jedinemu ni lahko pustit preteli, famejo i poć po svite, a ne znoš ca te tamo ceka. Puno od njih je dobilo lijavinu prvo nego su portili. To je kapitalo i Bipeta. Siromah je šo poli mediga i on mu govori neka pravo z limonon. Pokle por don ga pita medih ku mu je pasalo. „Vraga velega, kad vinen limon opet mi tece". Zato prvo nego rete po svete pazite kako ćete lemon doperivat.

Marija je sako toliko dobivala paket od Meriki. "Ca je to od oca", pitajo deca. "Da son njega cekala nanke vas ne bin imela."

Tornojmo se mi pomalo va naš kort. Rotacjuni su finalmente finjeni. Na kraje je se to lepo prišlo vonka, a ca kušto miljun kun više nego ca so racunali to ne importo. Neki štupido će to plotit, a to smo mi.

Recite ca ćete, ali va to krotko vreme ca je šinjor Hrvatin i njegova škvadra na pozicjune, puno tega se je storilo. Koko je na dvajstišest od meseca torno kljuci od Groda, podeštut je malo prolongo delo po the cestah, tako da ne bi rekli da to ni storeno dok je on ime komando va rukah. Ako niš, pokle sega tega će moć na mire spat.

"Bipo moj, znoš da son spo s tvoju ženu?". "Vero znoš ca, ja s tvojun nison nanke oka zapra."

Da ne bin samo kritigo, ćon anke nekega pofolit. Kako prvo to su đugaduri Potpićna. ki igrojo mići balun i naši kovari od Labina, ki igruju veli balun. Saka cos jenemi i drugemi. Puno su storili jeni i drugi i lepo je videt da se više ljudi prideva gledat partidi. Je i oneh ki bi oteli još više, ali za to treba i više šoldi. Potpićonci so šli napred, a sada nin treba neki dat velu špuntu va šoldah. Koliko son cu, a to je diboto siguro, najviše će nin pomoć ta nova fabrika na Pićonštine, kontra ke so horši anke neki od njih votali. Nikad ne znoš keda ćeš nekega bit potreban.

Kad malo pogledate, najviše se je proha dignulo kontru elektrani, cementari, fabriki od jupna, seda te nove na Pićonštine za ku receju da delaju kamini za zdolun perke imaju stroha zeleni. Dok je šoldi ni stroha, a šnjimi se operaju sa vrota. Recite vi mene od cega bi živela Općina Raša da ni fabrikah od cementa i jupna, općina Kršon da ni elektrani i sada će se si lizat te nove fabrike na Pićonštine. Saka cos kompanjulima i oštorima, ali kad trebaju veli šoldi tuka one trdo malo moreju pomoć. Zato ovi ki se tucejo da ca zdraveje živijemo, teško moreju co storit.

Za to malo ki se more pofolit i reć da je šo va penzijon bez dona bolovanja. Malo je ljudi va Labine i dalje ki neso kupili postoli va "Borove". Kapo od butigi Pifar šo je ti dni va penzijon pokle kvarnor i dve leta bez dona bolovanja. Kad bi ga co zabolelo dobi bi indormijo kad so ljudi pravevali postoli i se bi mu pasalo. Sega je pravo. pa i to da mu je jedon priša va butigu zvituru sto na uru. Dobro da se je to trefilo pa so mu finalmente i barkuni kambijali. Toliko postoli je proda, a on vajka ima problemi z žuljami na nogami.

Kad su pokrali butigu njemu ni trebala policija. Enco ka dela poli njga, je nakon por don noša tota po postolah keh je ime na nogami. Žol mu je bilo da ni dožive da mu klodu tentu, tako je mora kambijevat, šempre, postoli va vitrine da nebi žmarili. Pifar, uživaj va penzijone i da ti medih ca manje treba koko do sada.

Za kroj eko jena šćurica zote: "Tone, znoš da je moje Marije pest narosla. Prvo kad bi ca zela va pest još ga je voncalo, a seda ga ni nanke videt."

Uživajte va hlode i na moru, a vi siromahi ki imate bazen poli kući pazite da ne hitite pre već klora, kako ca je Sipe stori, pa je šo plavat va crneh, a priša vonka va beleh budantinah.

Vaš PIPICA