Pipica Novi foji, broj 58 25.1.2008 8:21
Morat ćemo Bosanci navadit na maškari
Blagdani su pasali i već smo pomalo zobili nonjeh, perke vreme leti koko zmućeno. Saki se je rashita na svoju fozu, a z šoldami su se hitali oni ki hi imaju puno i oni ki hi imaju malo. Zato ni cudno ca nan sako toliko nešto kreševaju, perke vide da je još mesta za to.
Ljudi su više docekevali Novo leto doma ili na placah vonka Labina. Pasat će baštanca let da Novo leto docekamo na najlepce place va Istre a forši i dalje, a to je naša placa va Storen grode. Vervan da bi bilo lepo anke na place na Poce. Kako son cu, pokle pol noći je bila puna Bosanci, a oni se držiju jedon z drugen više nego mi domoći. Pustimo njih da si somi dole organizoju, pa ćemo forši co navadit.
Anke va hoteli se manje hodi. Kede su ona lepa vremena kad smo Nove leta docekivali va hotelah va Rapce, pero anke va domah po selami. Pokle jenega takovega doceka Bepo je kompanjeva Marijo va Sveti Martin. Farmali so se va Sv. Nedelje poli kovaciji od Fuhtara. Kako je bi za glovu i pol manji od Mariji mora je poć na nakolu da bi je bušnu. Kad su prišli poli njene kući ote je hitit još jedon baćin, ali ona onako po starinski zgojena govori da za prvo noć je dosta jedon baćin. „Ca mi nisi zajno rekla", ne bin bi nakolu od osandeset kil brno valje od Sv. Nedelji.
Vidite, bolje je žensku zajno pitat, nego se prekidat.
BLAGDANI
Va hotelah se tancalo tri dni de fila i vajka je drugi don bilo najlepce. Fjumani je bi pun Rabac i tuka su pridevali sako leto koko na med. Retko da je tanac fini prvo pet, šest ur jutro, a sada kad va hoteli pridevaju Talijoni i drugi furešti pokle jene uri se je finjeno, perke jutro rano već porte na điti tako da od njih ni vele koristi. Va ona vremena, jutro va Storen grode ne bite videli muška ni breka, a sada turisti šeću, a muzej i se ca bi oteli videt je zaprto. To nan baš ne gre na cos.
Naši ljudi su pušćevali puno više soldi na bare nego furešti danas, tako se je sada teško navadit na tu siromašćinu. Špendevalo se je dosta šoldi za blagdani, pero vajka je nešto zostalo. Ki ti dnevi malo paseva po butegah ili markate more videt da je sadere trdo malo ljudi. Ni butigi od robi i postoli kede ne piše skonti od dvajsti do pedeset posto, pero nidere ni preveć vela fila. Najveće fila je va banke za penzjon dignut.
Recejo da je pokle Novega leta prvi mesec najhuji, pero koko hodi napred ne bude nanke jenega dobreg. Već sada prete kako će opet se krešit. Morete samo zamislit ca će se trefit ako korent kreši tristi posto. To će potegnut si preci sa sobon. Nafta i se ono ca se bobiva od nafti, kreševa sako toliko tako da će opet prit najceneje z drevon se teplit. Na žalost, starejeh ljudi poli nas je se više, a neki to drevo mora prontat. Ja znon jenega ka je trdo dobar za kalotat. Prvo Novega leta je kaloto spreda kući, a vane je trdo ledilo. Toliko se je zanesa da su mu se mustaći zaledili i storili špironi spoda nosa. Dobro da je žena naletela. Ako ga neki treba za kalotat, more ga tu i tamo noć va bariće na kampe od Rudara..
SABOR
Va sen te penzjonati će opet najhuje pasat. Kad plote šteuri neće nin joko puno zostat, a nekemu forši anke nic. Bez pomoći zbondi će bit žedni i lašni. Pero ne samo oni. Tako je jedon mladić jo trovo spreda Sabora. „Ca delaš?", pita ga Šeks. „Jin trovo perke son lacan". „Ca si munjen, sada pridevaju oni od Evropi, na ti dvesto kun i hoj jes va menzo". Drugi don je nalete Sanader i on mu je do dvesto kun. Treti don paseva Tuđman i pita ga ca dela. „Jin trovo perke son lacan". „Ti si još mlod i hoj na drevo lišće jes, a trovu pusti za penzjonati." Pa je neki kapoca reć da ni misli nonjeh.
Eko finalmente se je i Sabor kompleto. Puno je noveh pa će nin trebat dosta vremena da ćepoju điri, pero na lepe ploći će se joko brzo navadit. Prvi put imamo Cigona va Sabore, pero ne vervan da će nin on puno pomoć. Sebe je već trdo pomoga, perke kako piše, siromah šlovek ima por vituri i kućah, dok njegovi ževiju va barakah. Sanaderu je treba samo za numer i da bi pokuzo Evrope kako on misli na Cigoni. Je va Sabore još takoveh cigonah, ki misle samo na svojo guzico, a za narod hi ni joko briga. Štijen va đornalah da je puno njih ki nanke zajiki ne znoju, a su ministri na mestah kede bi trebali trdo dobro znat baren jedon zajik, ako ne i dvo. Ti ne bi mogli delat nanke na recepcije va hotele. Po ten mene zgleda da su neki finili neku večernju školu, a ne studiji.
MAŠKARI
„Tone moj, znoš ti da ja moren štet va škuren, i to bez vićulah". „Ca po vrajže?" „Son fini večernju školu". Ne treba njimi neka vela škola, perke će hi oni ki so već više let va Sabore navadit kako i ca krešit i šoldi zbondi va žep spravit.
Gren malo na nešto veseleje. Poce je štajon od maškari, kede bi se trebali si veselit, i veli i mići koko nekad. Treba pofolit Folšarijo, maškari od Čepića, Plomina, Kožljaka i Kršana ki pravoju ocuvat tu užoncu. Tonci ni kede organizat, pa treba poć na bondu od Reki va maškarani tonci. Folšarija je zela kljuc od Groda i obesila pusta Vraga Krešimentića, kega će spolit jušto na pust, perke vrag ne spi i on je kriv za se ca so nan krešili pasano leto.
Trdo nan je žol da malo labinjani pride videt tako lepe maškari. Najviše mi je žol mićeh od vrtića, njihoveh tetah i matri ke se toliko muce da hi maškarojo, a nimaju se kemu pokuzat. Morat ćemo delat na ten da Bosanci navadimo na maškari, ki bi nas forši prišli pogledat i zapljeskat. Fala semi ki su mi preko interneta zaželeli se najbolje va Noven lete i žol mi je ca ne moren semi rišpondit na onen ca mi pišo. Iman mesta samo za jeno šćorico: „Bepo te pježo seks va tri?" „Munjen son za ten!" „Ben onda teci zajno doma."
Budite mi pozdravljeni.
Vaš PIPICA