Pipica Novi foji, broj 59 29.2.2008 13:07
Naš pust je ime preveć slami va glove koko dosta našeh političari
Inšoma nanke da je vrag, se ono ca je lepo malo duro. To leto su krabulji durale samo mesec don, pero bilo je krotko i veselo. Škoda da preveć malo našeh ljudi uživa va te lepe užonce. Si ki imaju želji i volji moreju poć s nami. Folšarija će se držat one store, krepat ma ne molat, sen ten ca nas va Labine više kritikoju nego fole. Vervan da će nas pošnet štimat koko ca nas vane štimoju. Neki piše da Folšariju boli ona stvor za Rockwool, a Puležani su to va maškarah kritikali. Da van za sprovega recen, nas jušto boli ona stvor ca se tice Rockwoola, baren dok su maškari. Oni ki bi trebali za te stvora glovo razbijat, trdo su dobro plaćeni, a Folšarija ni taista.
Kritikali smo Plomin jedon i dvo dok ste vi ki to pišete trdo mucali. Mi smo tuka da kuntentomo stori i mlodi, pero s kanconami, štupidecami i šćoricami. Zoveju nas na se bondi, a to je sinjol da nekega vraga anke valjomo. Va Žejane, Samobore, Lovrane, Rike su nan pljeskali koko da je Severina prišla. Previše je oneh ki bi nan raj odmogli nego pomogli, pero na su sreću još je više oneh ki nan na bilo ku fozu pomoru i zato nin se od sega srca zafolimo.
MAŠKARI
Saki more kritikat, pero neka se potpiše tako da znomo kega pitat za pomoć. Mi ćemo drage volji dat palicu nekemu ki bi se to organizo, koko ca je va Rike ili Samobore. Pomoć ćemo koliko god moremo, pero vervan da će mu joja prit do kolin. Tamo si, od mićega do storega živeju za maškari. Kameljeri va oštarijah su maškarani i va sake butige imate baren neki sinjol da je štajon od maškarah. Poli nas son to vide samo va butige Runa na markate ka prodava kafe i čokolatini. Grod je našminkan koko da je Novo leto. Kad son cu koliko beci oni špendoju za se to prontat, bi son trdo kuntenat z onen ca mi napravimo.
Jedini ne vidi koliko našega slobodnega vremena mi špendomo za se to prontat, pero kada vidimo punu palestru dece i veleh koko ca je bilo na pust, zajno se zobimo. Ni van žol ni truda ni vremena, kad vidite kuntentu i rashitanu decu. Žalosno je kad neki piše da decu koristimo za to da pride ca više ljudi gledat maškari. Treba pošnet od dece, i zato saka cos teticami va ažile i maještrami va školah.
Za kroj smo spolili pusta Vraga Krešimentića, ka je kriv za se ca su nan krešili pasano leto. Pero, naš fugista je napravi veli žbaljo kad ga je šo polit od glovi, tako da je brzo zgore, perke je ime preveć slami va glove koko dosta našeh političari.
Poceli smo se prontevat za letne maškari. Kako je po lete trdo teplo, Bepo bi se ote maškarat va Adama. Da bi pokri onu stvor med nogami, šo je va botigu pravat per od smokvi, divega kostanja, palmi... Pero, se mu je bilo mićo. Butižerka je otela videt tu stvor. „Mladić moj, hiti ti lepo tu tvoju stvor preko ramena i mašakroj se va benzinaja".
Vrag je zgore, pero njegova mat je još vajka zbujena. Z jene bondi neki još vajka kreševaju, a drugi govore da hi treba sedan don bandonat i kupevat samo ono ca treba za preživet, koko bi preci kalali. Recejo da tako delaju Talijoni i Nemci, pero oni to delaju koko bi malo zašporali i prišli poli nas na feriji. Ca neso to govorili pred Božić i Novo leto kad se ljudi najviše hitaju šoldami.
KORIZMA
Sada su neki va korizme da bi malo telo ocistili, a neki su šempre bez korizmi. Kako bi to zgledalo da delovci ki delaju va hotelah, za krešit ploći, naprave šjopero po zime kad su hoteli zaparti. Hote ka put va farmaciju videt koliko šoldi moraju neki ljudi stres za medežiju. Na jes moraju šporat, da bi mogli medežiju kupit, a još ko poslihaju takoveh, saki don će nin trebat jena medežija više.
Marija je bila nešto bolna, pa njoj je kćer saki don kladevala cepić Voltarena va guzico, kontra boli. Kćer je bila jedon don na đite, pa je rekla mićemu neka on klode none cepić. Nona je kalala budonti, a nucić pogleda i pita. „Nona, ca ću klas va to mićo škuljo ili va ta veli takujin?"
Se brzo paseva pa je tako pasalo i Valentinovo, don namuraneh. Puno njih govori da je ta don sigurno zamisli neki butižer. Koliko son cu ni bilo preveć neke fili za rožice i regoli. Ki zno, forši su namurani šli va bošak vijolice pobirat i tako natirat butižeri da kaloju preci.
Ću van pravit jenu štoriju ka se je ta don za sprovega trefila. Žena je mužu kupila vevericu. Pero, prvo nego je šo doma z dela, on je anke kupi vevericu da bi kuntento ženo. Pokle se je videlo da je on kuntento vevericu ku je žena kupila. Njegova je bila muška i cilo se vrime prtila na drugu. Oni su bili malo đelozi pa su hi tornali va butigu i zeli papagala. Samo da ne bi on navadi gonat, pa je kapoca pravit neke stvora ke oni delaju.
ČUČAVAC
Vrime je da hitin jeno oko na internet. Na www.novifoji.com puno tega piše i to je lepo. Jedon me por puti pita koko se po domoće rece čučavac. Ja ne znon, forši je cupitić, ako je čučat - cupit. Još bin ime tega za odgonat, pero ni mesta na pađine, pa ću hitit još jenu šćoricu.
Nemci su trebali prit va selo poli Barbić. Da ne bežijo žedni va bošak Bepo i Tone su šli va konobu popit bukaletu vina, pero trdo su se napili i zaspali poli bacvah. Tako su hi Nemci nošli i zajno klali pred zid. „Bepo, oni će hitat va nas". „A ca ćemo se ubit, Tone moj". Sada moren i ja poć zalit. Ženskami želin srećan Dan žena, a vi muški cekajte svoj don, ako ga docekate.
Vaš PIPICA