Pipica Novi foji, broj 60 28.3.2008 8:17

Bez Armanda Sušića šesnajs oktobra va Nedešćine ne bude ca je bi

Ne znon kako je von, pero mene angurija propjo ne funkcjono joko dobro. Sako toliko va te arje, gradi kaloju ili kreše po deset rigi, a medigi govore da to ni dobro za telo. Zato preci sako toliko skoknu deset i više posto pa smo vajka va livele. Uzom je paso, pero još vajka puno njimi ne gre va glovu ca bi reć da je tako rano. Se mi se paro da son jedon put to napiso kako se racuno, pero dvo puti je dvo puti. Pogledajte malo na kalendarjo i ćete videt da mladoletak prideva na dvajstiprvega tretega. Jušto ta don je pun mesec, a prva nedelja pokle punega meseca je Uzom. Kvarnor i šist dona nazad je bi pust. Ako son žbaljo jovite mi, pero racunojte da daljnjeh pedeset i cetire leta ne bude tako rano. Ja vervan da ću to doživet i žele bin da nas bude ca više.
Hoteli će se oprit raneje nego prveh let. Delovci će bit malo kuntenteji perke su nin rivali krešit ploću za veleh pet posto. Za to su se sindikati mucili por meseci, a va to vreme se je krešilo i preko deset posto. Pero saka cos jenemi i drugemi, perke saki don štejete va đornale da je kirešila benzin i se drugo, a za ploći joko retko.
Koliko će to pomoć da naši ljudi reju delat va hoteli, valje ćemo videt. Saki don posluhan na radije kako se na se bondi išću kamaljeri, kuhari i drugi, pero se mi se paro da ni joko puno oneh ki se jovljaju. Opet će prit puno delovci z bondi, i opet ćemo puhat koko ca smo puhali na Bosanci kad su prišli va kovu delat. Dobro da su oni prišli, danas bimo imeli ažila i školi deboto prozni.

KANTADORI
Si ste više, manje čuli za Moteta Balotu. Treba je poć va Rusiju i jedon mu govori da su tamo si hoteli od tristi pijani. Kad se je torno doma pokle mesec don, gona pretelami: „Paso son toliko hoteli, pero va nanke jenen nison noša pijanega šloveka". Mote je bi vajka na škerac, a tako bimo si mi trebali bit, a ne puhat jedon na drugega.
Preveć mlodeh ljudi umire, a to ni bez vraga. Sada nan je porti i Armando Sušić, bez kega šesnajs oktobra va Nedešćine ne bude ono ca je bilo. Kad je on zakanto, se je ronilo. Denas po done cujete samo tu i tamo Rošku na markate zakantat. Nekad se kantalo po done i vecere. Danas bi ti rekli da si pijon ili si porti va šofite.
Pred mesec don su zakantali na markate Cvik od Trgeta, ka je priša doma pokle šesnajt let od Meriki, Branko Kosić, Milijo Milevoj i Remiđo Škitacon. Sakemu normalnemu su srhi pasali, pero bilo je i oneh kisu rekli da su popili kad na polne kantojo. Spametite se kada ste zadnji put na polne zakantali i štupidurili, a to bi sakemu sako toliko trebalo.

DOMI
Lepo je cut da se renovoju domi va Koromačne, Šumbere, Martinsken i drugdere. Lepo bi bilo da ti domi pokle anke funkcjonojo, da ne bi neki pokle govori da su se veli šoldi va vetar hitili. Lepo je bilo va dome va Raše na letnice emisiji „Užonci našega kraja", ka se već deset let vrti na Radio Labine. Bilo je trdo lepo, a culo se je puno tega ca smo već zobili.
Si smo mi, a najviše oni malo srareji, zobljivi. Bepo se je tušira i pokle por menuti onako gol se gleda va zrcalo. „Cekaj malo, ca son brusi ili bin treba brusit?" Pero nanke njegova bolja polovica ni bolja. Više od pol ure se pituriva. Šla je razmešat šugo i torneva se spreda zrcala. „Cekaj malo, ca son prišla doma ili bin trebala poć vonka". Na žalost je i našeh političari, ki zobe od kuda su nin koreni kada pridu na lepi pozicjon i još lepci šoldi. Štejete koliki šoldi od Istriji porti va Zagreb, a oni nan tornevaju na pumpetu. Šjor Lino Červar ka je od HDZ-a, govori da bi se IDS treba više rivat va guzicu onemi va Zagrebe i to za soji šoldi. Bi li on bi trener od hrvotske reprezentaciji da je va IDS-e? Ako smo već poli demokraciji, ne importo va ke si partije, nego koliko valjoš, a njemu saka cos koko treneru, pero koko puno njih, za Istriju ni puno napravi. Na su sreću, poli nas još ne prgaju po smetah koko va Zagrebe, magari pišu da je Pula po precah trdo zgora Zagreba, pero nanke Labin ni joko dugo.

EVROPA
Ne znon kako je von, pero mene je već puna bareta te Evropi, NATO-a, ZERP-a... Ca najbolje niš ne znat, cut i videt. Ljudi samo teceju koko muhi bez glovi i telefoninon poli uha. Bepo je bi va kompanije. Porti je z vituru ća, a Tone ga zove na telefonin neka se torno, da je zobi na stole telefonin. Torno se je nazad po telefonin na kega se je jovi va viture. Po ten vidite koliko ljudi samo letiju, a mozak nin se manje funkcjono. Zato prvo nego nan Talijoni i Slovenci poloviju so ribu, hote peškat, perke receju da onda mozak najviše opocine. Ako budete sreći koko moj sused Ante Fuštin, forši ćete na jeno udico ćepat devet ribi. Ćepo je pešekana, a va njemu je bilo osan mićeh ribi. Samo neka ga posluži sreća va zdrovlje koko va ribah.
Prva subota va cetrten mesece je blizu, zato si moji od fešti Krojnica, pošnite se pomalo prontevat. Vervan da će to leto prit više Merikani, ako ne ćemo mi letet poli njih, perke kako hodi, još malo pa će kunelica ćepat dolar. Tako je šla stareja Labinjonka va Pul na aeroport, da gre sinu va Meriku. Ni njoj se propjo šlo va lopran. Pilot joj gona: „Šinjora moja, nemojte imet stroha. Još jedinega nesmo gore pustili". Za sada, ja ću vas pustit na mesec don.

Vaš PIPICA