Pipica Novi foji, broj 61 28.4.2008 7:57

Fumadori moji, još malo pa ste pofumali

Bi reć da ne šteju Novi foji va Merike samo naši Merikani, nego i njihov prešident. Zadnji put son napiso da će kunelica valje dolar ćepat i Đorđo je zajno dolete va Hrvotsko i obećo da će Merika bronit Hrvotsko ko je ki napodne, samo od stroha da kunelica ne napodne dolar. Đorđo moj, za nas tuka na Labinšćine ni stroha, nas ima ki cuvat. Ne daj Bog da nas ki napodne, zajno bi skoknuli Žviceri cuvat fabriku od cementa, Austrijanci fabriku od jupna i hoteli va Rapce, a tuka bi nin pomogli i Talijoni, Nemci bi cuvali elektranu, danci Rockwool, za kega se zeleni tuceju da nikad ne prodela i dežmontoju fabriko, a Kinezi keh je najviše na svite prit će cuvat butigu. Recite vi mene ki nan ca more. Ne treba non NATO, mi ga već imamo. Ne daj Bog da se ca trefi, perke na kraje bi se oni med sobon potukli, za pobrat ono malo ca nan je još zostalo.

KREŠIMENT VA SABORE
Mići deca znoju da riba od glovi smrdi, a on je priša valje od Meriki da nin to pravi. Koko prvo, somi sebe so kaštigali va Sabore, zajno su krešili ubed od deset na dvanajs kunelic. Siromahi, će morat ploći krešit za tako drogi ubed plotit, a kamoli kafe od dve kunelice i pol. Njega najviše popijeju, perke moraju bit trdo zbujeni, da nin ne bi ki ca spreda nosa pobra.
Nekemi će ta krešiment forši dobro prit, perke je oneh ki bi trebali štabilo kalat. Je i poli nas takoveh. Tako je dotoresa Eda kontrala Žan Pol Vidasa na markate. „Kada si stori tako veli trbuh?", pita ona. Kako je on vajka zbujen, perke cuva markat po noće, zajno njoj je rišpondi: „Dotoresa moja, to su dotori krivi. Kad son bi mići, vajka su mi govorili neka puno jin, da ću prit veli. Pero mene je hitilo na drugu bondu".
Ljudi moji, jite i pite ako imate s cen kupit, na to draginjo, perke življenje je se kraće. Ne paso don da ne cujete za kakovu nesrećo. Tako je kapitala vela nesreća kede je puno ljudi glovu zgubilo. Kad su prišli gore, deset hi je finilo va pakle, a jedon va raje. Ti ki so bili va pakle, saki don dobivaju kuhano jes, a ta jedon va raje samo škatuleti. To ga je malo razjodilo, pa se je potuži Svetemu Petru. „Šlovek moj, mi moramo šporat, a ne koko oni dole. Nećemo velja za jenega klas kuhara". Morete zamislit da mene, kad delan po noće, klodu kuhara za marendu mi prontat.

FEŠTA KROJNICA
Fala Bogu, mi smo si doli dobrega jes i pit na fešte va Krojnice, pero na naš racun. Koko i sako leto, bilo je trdo lepo i veselo, a bi je anke jedon ka je priša valje od Paragvaja. Sopa je gitaro i kanto koko gardelin. Kad kanto, i mrtvega zbudi. Žol nan je ca s nami ni više našeh preteli, Flavija i Vita, pero i na njih smo se spametili. Koliko let fešta duro jušto, ne znon. Preko tristi let sigurno, perke i mi već imamo kakovo leto.
Tako govori Bepo Tonetu. Sada imaš šezdeset let, ako doživiješ leta koko sada zgledaš, ćeš živet najmanje sto i dvajsti let. Danas je veli valor ako šlovek dela. Eko, ja već tristi let delan va Rapce. Ni hotela va ken neson dela, a od tega najveć po noće. Ljudi moji, tuka sacega doživijete, lepega i grdega. Jenu ka mi se trefila, neću nikad zobit. Na tri ure zat ponoću, lift hodi gori-doli. Son misli da mu je portilo nešto va komande, pa son ga bloko na recepcjone. Vrota su se oparle, a nutra ženska zamotana va beli lancun koko špirito. Samo oce njoj je bilo videt. Namesto da se ja trenen, ona se je trenula koko da je vraga videla. Ca son ime z njo do pet ur jutro, neću van nanke pisat, perke neki od vas nebi nikad šli po noće delat na recepcjon. Morete zamislit da je na recepcjone delala jena ženska. Ja paron da bi se bila popišala od stroha, a forši i visrala.
Jenemu se to trefilo, pero ne od stroha. Šlovek je hodi na široko po ceste. Tri mlodi dotori ga gledaju i kontreštivajo. Ca bi reć da tako hodi? Jedon da ima marojdi, drugi lumbago, treti da je nogi prekinu. Vrah nin ni do mira, pa su ga šli pitat. Ljudi moji, tako hodin perke son se posra va bargeši.
Kad neki govori, hojmo va Evropu. Ma ca su oni kontra nami, oni nanke na kvarat ne misle na siromahi koko mi. Još se vajka moreju boci davat nutra, a sada će se moć i najlon vreći. Kako gre napred, na red će prid fudrini i panolini, perke pokle vrećah oni se najviše špendivaju. Pošnite hi pomalo spreljevat. Za ženske je lahko, perke one znoju kad nin pride. A muškemi je malo teže. Dobro ko budu zamevali fudrini na kusi, pero ku bude na kili će imet co brusit, a dece će se manje bit.
Bipetu više ni treba fudrin. „Imaš ga i ti koko prokuhana hrenovka?", pita ga Tone. „Ko mi praviš kako to zgleda, ću ti znat rišpondit." „Joko je nagrišpana i na pol se stisne." „Ni više ni manje, jušto takov je".

FUMADORI
Fumadori moji, još malo pa ste pofumali. Kamo god pridete va barići i restoranti, ste se bliže vrotami, za poć vonka fumat. Ja neson nikad fumo, pero son se dosta dima naguta ca su ga drugi pofumali. Najhuje je va teh mićeh barićah. Tako va nekeh barićah, dvo-tri od njih ga zakure huje nego elektrana i Rockwool skupa. Sada će lepo poć vonka fumat, pa ćemo si skupa bit zdraveji. Pero na žalost, njih će bit više vane nego nas nutra, a bez kompaniji ni gušta pit.
Dobro da su ti telefonini od žepa, pa ćemo se sako toliko cut. Najteže će bit onemi na kampe đaponeze igrat. Dvo nutra, dvo vonka, i preko telefonina punti govorit. Tamo je vajka veselo, a zno se i zakantat. Škoda da na partidah ni više ljudi, perke saku partidu dude majmuni i pederi, baren tako hi zoveju neki ki gledaju partidu.
Štajon je od šparugah, pa puno od njih hodi pobirat perke to će brzo pasat. One su sada dobre, a od leda so, pero ni to to. Kanduti lipo unjujo, a puno njimi će kolesterol skoknut perke se puno joji poji. Suseda posudi od susedi dvo joja. Pokle mesec don po svoje mole vrna samo jeno. „Ma lepa moja mola, ja son van dola dve joja, a ne jeno". „Vero imate pravo, bit će da je moja mat žbaljala kad hi je brojila".
Ja neću žbaljat, pa ću finit. Ma vero nećun! Još jeno za kroj... Govorin pretelu: Iman Austrijanca va hotele ka se ni šiška tristi let. Ta mora imet vlosi da te bog sacuva! Ne, plešiv je. Budite mi lipo pozdravljeni i srećan van Prvi moj.

Vaš Pipica