Pipica Novi foji, broj 64 28.7.2008 10:50

Dubrova more zostat bez vina, ali ne i bez Konti

Teplina je lepi moji ljudi, a potan je teško mislit, kamoli co pametnega napisat. Govori Bepo Tonetu: „Ćo moj, znoš da je tristi pet va hlode!" „Benj kega vraga delaš va hlode!?" Bi reć da so i naši političari va hlode, tako da ni cut niš pametnega. Skužojte mi, tu son se malo zalete. Kad so naši igrali balon, tamo so se prežentali koko i paroni, a kad delovci na placami ili va fabrikah co kontreštivajo kontra njeh, a to je na velo žalost retko, skrijo se va škulji koko i miši. Kad se neki prežento spreda njihoveh vrot i govori da će raji krepat od gloda nego tako živet, obrno glovo koko da ni jedinega. Recejo da Boh se vidi, ma se mi se paro da bi treba malo više oci otpret.
Sada nan je teplo, a pokle smo dobili te nove karteli za korent plotit, teplina je zajno skoknula dvajsti cetiri posto. Dobro da so nan hi sada doli pa nas je paso ledeni pot ka nas je malo ohlodi. Više nego jenemu će ta zima bit trdo ledena. Ki se tepli na korent, a teh je baštanca, ošto najlaglje je buton takat, već sada misle koko prit vonka sto mižerijo od ploći, a kamoli penzijona. Ne bin se cudi da sako toliko nojden nekega polejenega va kvarćere.
Poli njih je tako, ku ne plotiš korent zajno ti ga dištakojo. Policjoti so malo šesneji. Ko napraviš kakovo štupideco i ne plotiš multu moraš cekat por meseci za poć va paržon. Ko je to po zime lepo si va teplen i imaš jes za nic. Neka samo neki rece da oni neso šesni, a si pušo nonjeh kat hi farmojo na ceste. Znote ca, tornevamo se sto let nazad i opet ćemo bit na kandelah i petrolje pa će saka fameja imet petses dece kako nekad. Tako će i partida va postelje dulje durat a ne koko i poli Bepeta. „Bepo moj, ca si već fini." „Lepa moja Marija, smo na bot poceli."
Ako niš, dobro so pocele fešti va Labine i po Labinštine. Zato ljudi moji rashitajte se, ošto ni petka, suboti ili nedelji da se co ne trefi. Sacega je, za mlodi i za stori, pa vervan da će saki nešto noć za svojo dušo. Recejo medigi da to valjo više nego bilo kakova medežija. Zato portite bilo kamo co posluhat i rashitat se, tako da baren hip zobite na ono grdo bondo.
Ja znon, mi Labinjani smo malo cudni. Anke ko je za nic, a nimamo šoldi va žepe za co popit i plotit, nećemo poć. Pogledajte va Zagrebe. Za prvi moj kad dele pažul za nic, prido si političari od Zagreba i to s famejami. Najkuntenteji so ako to televizija registro tako da se vidi koko so oni škrbni ošto so jedon obed zašporali.
Drogo mi je da će Konti bit na Dubrove ošto to bi bila vela sramota za seh. Ne importo ki je tamo gospodor. Puno njih se je kambjalo, pero konti moraju bit na proven meste. Si oni so delali i delajo za šoldi. Bez vina morejo zostat, koko ca se je trefilo jeno leto, pero bez Konti nema šamse, bi reka moj Keko.

KLAPE
Saka cost Vozile koko je organizo klapi na place va Storen grode. Kat je nešto lepo, jedinemu ni teško prit hodeć va Stori grod. Placa je bila krcata, a ote bin da tako bude anke na Dubrove. Dalamtinci trdo štimojo svoje besedi i kanconi. Tako bi trebali anke mi naše konti i sopci. Zato pridite. Veći je gušt kantat i sos kat je se puno ljudi. Anke Remzo se je pomuci da napiše por besedi po domoće. Ko hi mene prešteje, zajno ću reć da je veli labinjonski zet, magari već je, pokle toliko let ca je va Labine.
Sred je leta. Turisti je se više, pero ljudi za delat va hotelah se je manje. Na bolovanje hi je baštanca, ošto manje više delajo za dvo, tri od njih. Mucijo i delajo, a koliko će zdurat ne znon. Met sobon brontoljojo, a od tega ni pomoći. Teplina je vela, a do kraja je još puno. Njih jedini ne pita joli morejo ili ne. Kat fine poli mediga nanke onda nin se joko ne verva. Turista to ne intereso, ošto vajka se gona da on ima pravo. Tako so neki naši mladići gledali partido va Rapce, a jedon stori Nemac se je puntelo spreda televizijona i isko od gospodora da prehiti na nemški kanol. Ki zno, ni rivo dobit kontra partizani pa je misli da će tako dobit. Zgubi je stemi mladićami ma anke Nemci od Hrvoti.
Talijoni je se više. Jedon se foli Istrijanu koko oni imaju trdo lepa imena, San Pietro, San Marko, San Paulo. Nesmo ti ni mi slabeji, govori Labinjon z vlaške bondi. Te pježojo naša istrijanska imena: san lacan, san žedan, san gol, san bos.... Pokle je kreši korent će prit još neka nova imena...san leden.

NK RUDAR
Mladići moji, bite se trebali malo zamislit. Pret jeno por don son priša va diškorš z jeno lepo mlodo. Ono ca mi je rekla lepo me je inkantalo. Gona da je kuntenta soma sobon i da je mladići joko ne interesojo. Forši ni naletela na provega, a forši je to sada ošto je trdo teplo, a kat malo zahlodi i kad je bude trebalo malo steplit forši će kambjat pamet. Koko got bilo, malo je videt mlode i mladići da se držo za rucice i šećo po Labine. Ki zno, forši hi je sron pa to delajo va škuren. Mlodi danas hode va tonci na pol noći i tornojo se na pet. Mi smo portili na sedan vecer a tornali doma na sedan jutro od Vidikovca. Bi rekli saka glova svojo pamet.
Današnji don je teško bit pametan. Vidin da pametni delajo va Rudare. Priden jedon don na kamp, a tamo puno slinovci, skupa z materami i ocami, nonami i nonetami. Bilo hi je više nego kad prva škvadra igro, a neke neson nanke pozno. Bilo bi lepo da prido šempre na kampo a ne samo sini i nuki gledat. Lepo bi bilo da to organizojo i za one stareje ki so puno doli za Rudar, samo ca bi tuka bilo trdo malo oci, matri, noni i noneti. Eko jedon mi govori da je zadnji put bi na kampe pret tristi let, a jeno leto je bi najbolji kaninel. Lepo je cut da je mići Stepcić šo va Reko, a to je senjol da se z decami dobro dela. Jedon je porti z oštariji na kampe trdo jodan. Palo mu je deset kun a nanke ni šo za ten. Drugi don smo se kontrali, a on govori ni to niš, kat moje žene skokne prešjon porti petsto kun i moran trdo mucat.
Vi ki štejete Novi foji na internete ne mucite, pero i pišete da ste manje više kuntenti z mojo pađino. Šimpatiko mi je bilo ca je jedon napiso: Pipica spravi maškari i porti po kljuc općini Pićon. Kat smo let nazad zamevali kljuc, se je funkcjonalo, sada re se nopak.
Tri so sinjola da starite. Prvi, pridete zubljivi, drugi... već son zobi..
Pulaštri, nemojte zobit prit na Fešto Pipica na dvo angošta, a Vi, Steli i Mario ozdravite da rivote.

Vaš PIPICA