Pipica Novi foji, broj 66 29.9.2008 14:07

Delovci se manje vervajo sindikatu

Vajka se pitan kako pošnet pađini, a ta put ću van napisat nešto voc nećete forši nanke vi vervat. Jenu šinjoricu je zbudila kokoš kokodakajuć uru zat polnoću. Mislila je da sanja, pa je zbudila muža, ošto da mu to rece jutro bi reka da se pomutila kokoš i ona. Skoknuli so va dvorić i nošli freško joje i kokoš zbujenu koko cuvetu. Šinjoricu trdo dobro poznon, kone bin reka da joj je mesto va manikomije. Joko lahko samo portite. Kokoše je zajno dola tristi posto sardic više, ošto se delo po noće bolje plaćeva. Kezna ca je stori gospodor peteh. Do sada njoj ni do mira po done, a sada neće nanke po noće. Kokoš će, ako niš, bit trdo kuntenta.
A pogledajte naši delovci, delaju sakako, a plaćeni so kako-tako, a neki anke por meseci nikako. Sada pensojo delovcami zet oneh pol ure za marendu, noc saki na svete ima pravo. Va Japone delovci delajo đinastiku petnajs menuti i to za vreme dela. Marendu si som plotiš, a još biš je treba na skrijeć pojes. Lepo mi je žol ti veli diretori ili meneđeri koko hi po nove zovejo. Toliko šoldi špendat na te vele školi, da bi na finjetke priša veli nic od šloveka. Je i oneh ki so do cera bili delovci, a kat so dobili komandu va ruki, koko da je šajeta vonjeh hitila.
Slabo ne želin jedinemu, pero ki dela slabo prvo ili pokle, to mu se torno. Jedon don more bit potreban kruha, pa će mu bit dobar i ona kega delovac ni rivo pojes, ošto ni ime direta na marendu. Ca će sindikati storit da se to ne trefi ne znon. Se mi se paro da so preveć deboli. Delovci imajo trdo stroha delo zgubit, noc ti veći joko dobro racunojo. Oni so saki don se forteji, a sindikati se debuleji. Zato delovci se manje vervajo sindikatu. Pero teško je bit kapeton ako nimaš vojsku za sobon.

KREŠILO GROJZE
Jesen i zima so na vrotah i treba bit pronat na se, samo ne na bolje. Sada je vreme kat se trga i šperojmo se da će bit puno grojza i dobrega vina. Grojze je već krešilo i do tristi posto, a toliko će i za vino. Oštori su to storili po napred da hi nebi ta vela glod zatekla. Recejo za Hrvoti da najviše pijejo. Znote koliko treba Labinjonu da popije i da mu pokože nic pet. Dvo dni ne sme pit. Ljudi moji, jite i pite ako imate co i scen kupit. Sada će jena butega nekemi pojes šoldi keh su šporali za nešto drugo.
Oprla se je seksi butega va ke morete sacega noć i to po svoje mere. Da se ženske some kontentojo imajo i veleh i srednjeh, crneh i beleh. Mićeh ni, ošto takoveh imajo anke doma. Pero anke za muški je sakakoveh i zgledajo koko vere. Sada će va Labine bit još više storeh mlodah i mladići, ošto će se moć i somi kontentat. Mlode i mladići i vi stareji morete i to provat ko vas ni sron, pero ni ga do verega.
Šla je Marija va to botigo. Kat je prišla doma gona Bepetu kakoveh je se videla. Pita Bepo: „Je bi ka koko moj?" „Tako miće vero neson videla". Drugi don je porti Bepo na vižito. „Ben si vide kakovo koko ca je moja", pita Marija. „Vero son, Marija, va nje je butiga oprta." Koko got da je, mladić se je lepo spameti opret nešto novega ca retko ki va Istrije ima. Baren po necen smo met prvemi.
Dobro da so Novi foji, tako rivomo prelejit ki je dožive zlotni pir. Koko hodi napred, više njih će ga doživet s regolon ot te nove butegi. Se je reje takoveh pori, a oni najbolje znojo ca so pasali va teh pedeset let. Bilo je sacega. Ni bilo samo lepega, a bez kolježa ni sigurno pasalo.
Mladić gona matere i ocu: „Kat ste bili mlodi, bite se poklali, a za dvo minuti bite opet gonali. Sada se pokoljete i ne gonate petnajs don". „Sine moj, ona ka nas je miri je umra", gona mat.

NK CEMENT
Eko, prišlo je vreme da ga se more kupit va butege, pa će vajka bit mir va kuće. Zlotni pir je danas teško doživet jenemu poru, a kamoli jene škvadre. Zato saka cos ''Cementu'' od Koromačna, ka je rivo pedeset let zdurat. Puno je ljudi pasalo kroz se ta leta i oni so se semi zafolili kroz jeno lepo fešto. Pero, koko prvo morajo trdo mene zafolit. Sada ću van napisat zoc. Koko slinovac son poce, pero trdo malo va ''Rudare''. Za sprovega son poce igrat va ''Radnike''. Pokle por let smo se rasuli. Šo son va ''Partizan'' labinski, ne ona ot Beograda. I on se je anke rasu. Neko vreme son igro za Vinež i tamo se je sejno trefilo. Šo son igrat za ''Rabac'' i tamo je šlo nopak. Na finjetke son fini va ''Cemente''. Va te lepe kompanije son igro por let.Va Raše smo se trefili pokle jene partidi, jušto kat je Tito umra. Već onda se je govorilo da će se Jugoslavija rasut. Zajno son pomisli da ni vrah da son i ja za to krih. Lepo son reka som sebe, Pipica pusti balon ošto će i ''Cement'' poć vrit. Tako son stori i pomoga ''Cementu'' da dočeka zlotni pir.
Bepo je ot vajka munjen za samicami. Prez njih ni moga nanke kat se je uženi, pa je ženski kambijeva već nego drugi štomanji. Šegof koko je bi on ni nidar zapusti svojo ženo, sko se je na gusto vide hodit na braceto. Kat ga je Tone pito koko mu gre zat ruko da so mu žena i amante kuntente, on je rišpondi: „Ja son ti koko đogador ka mora bit vajk pront, preko šetemoni iman treningi, a va nedeljo je partida. Tako će on doživet zlotni pir, a vi na kroje meseca Novi foji. Veseli i zdravi mi bili.

Vaš PIPICA